علي والسياسي

قارنتك علي وي اليحكمون..
وشفتك ياعلي مفرط بالاحكام


شني تحكم الدنيا وعرشك بساط..؟؟
وشني الجامع مقر القائد العام..!!


وشنو عود اليتيم يكضلك الباب..؟؟
اليتيم يروح يسكن دار الايتام..


جا ماعادهه ولاكضلك الباب..
كون بصدره قنبر ساحب اقسام..


كلشي يصير يجوز يفخخ البيت..
تحت مهرك يجوز يخلي الغام..!!


تكضي الليل تفتر وانته مسؤول..؟؟
السياسي الزين كون المغرب ينام..!!


بين الناس تخطب لايبو حسين..
علي المفروض تخطب من وره الجام..!!


كسر نوك واطلع موكب وياك..
وانشر عالدرب رماية سهام..


ناكه مظلله وتركبه ابو حسين..
وعمار ابن ياسر كعده كدام..


وخل مالك الاشتر كبلك يفوت
يكطع كون سير الشارع العام..


بدولتك هم جنت تنجز مشاريع..
وهم جنت تاخذ بصمة ابهام..؟؟


فضه وقنبر شكد ياعلي انطوك..
يلا تعينو بالبيت خدام..؟؟


عقيل شراد منك حتى تجويه..؟؟(1)
أخَيك هذا ضمه لظهرك احزام..


كبل ماكو دمج وادمجه مولاي..
علي سجله سياسي مهدم الاصنام..!!


شعجب ولدك علي ماطلعو ايفاد..؟؟
ددزهم عالبحر يكضولهم عام..


دبرلهم عذر خل يصيفون ..
بحجة مشو دوره بنشر الاسلام..!!


علي تنطي الخبز تتلثم شبيك.
جا ماكشفت وجهك للاعلام..؟؟


جا ماصار بينه الصار مولاي..
وظل ياهو اليجي وكال انا ابو الثام..

وظل ياهو اليجي وكال انا ابو الثام..