قفشــات عراقيــه

ما حاجة اكَول الخالقك فنان
بعد رب الجلالة وركز ابواحد

صار سنين وانتي بدمعي تتوضين...
من صار الأذان لغيري صليتي...

أحبك حب صدك من حب أهلنة الراح
مو حب هالوكت و العشـــــك طياري

من كد مارسمتك صوره بالبال
كمت حته من اشخبط تطلع انته

اذا رايـــــــد تسولف ســـولف بماعون

عســـــــــل كلمات حلكك لا تبديهـــن

حجى كلمة المسيح وصار روح الله
وانا شكد حجيت وماصرت روحك..!!

أذا باعك صديق برخص فد يوم
البخت بالمشتري والعار عالباع

بسم الله الرحمن الرحيم
{ياأيها النفس المطمئنه ارجعي الى ربك راضية مرضية}
"صدق الله العظيم"
الـربـك روحــي رجــعـت يــوم الــفـراك...
مـظـلـومــه بــمـحــبـتـك وشـــتـكــت لله//

انا شايل كرامة بكد نفوس الصين

الهوة لو شال خشمة يحلم اشتمه

زنجيل ابوذيه..غــزل..

شوف شحلو طوله وهم شيته
كتبت اسمه اعله صدري وهمشيته
خطر عبوات دربه وهمشيته
وهم بمشيتي وطك عليه

واصيراً وذره وذره وتكطع
وحطن كلبي بيدك وتكطع
اوصلك وجيلك وتكطع
شمى تبعد يزيد الشوك بيه

ويصير الشوك ناعم منتمر بيه
وانه شفافك ضكتهه منتمر بيه
ادري شبيه دربي من تمر بيه
يظل يلطم براسه شكد خطيه

لان ماكو بجمالك منتعبره
ومو سهون جمالك منتعبره
الشايب بيدك انته منعبره
يرد لصباه واظن اصغر شويه

وعلى الرقه البيك الله يعينك
وعيونك محنه الله يعينك
تره المفروض انت الله يعينك
ملك بس للجمال اعله الوطيه

وبجمالك كفر حتى انه اشوفك
تعال وهذا حالي خل اشوفك
اذا عالجسر تعبر انته اشوفك
حقه يفك اذا انت منيه

وماريدن ابد بعده وقبله
شفافه الكعبه صارتلي وقبله
اذا فد يوم اكضنه وقبله
اشلع اشفافي وشفافه سويه

وذب شفافي وحفظهن شفاتاك
صلب متغيرك الصعبه شفاتاك
شمالك تركض انت اوكف شفاتاك
انطينه صبر شنهي القضيه

لان مامفتهم انت شمالاك
وعدل وياي جنت انت شمالاك
ردت منك تلم شملي و شمالاك
انه بدونك مطشر حن عليه

واذا فعلن تحبنه لمحنه
نعلمه احنه المعزه و المحنه
تدري احنه الكتلنه و المحنه
لان نظرات عينك بابليه

ماردت احبــكـ..

ما ردت احبك حاولت

ومن لفظه اسمك حاذرت

جلمه وشلته من الحجي

ومن اللسان اخفيتها

وبيبان روحي مقفله

و ع لا احب سديتها

صلفه امنياتي الرادتك

سالتني عنك بس صمت

كلش ولا حاجيتها

كالتلي وينه وجاوبت

ما ادري ما دليتها

ما ردت احس بمحبتك

لان كبلك الروح انطيتها

ولخاطرك رحت اعتذر

منيت بيه لخاطرك

مثل الطفل لمن يمن بحاجته

وياك اعز ناسي انتهوا

ما عدت احس بعازته

بدربي كلت لو مو سوه

امشي حياتي بلا درب

يمكن يشح عني الهوا

لا بس جذب.....

معقوله ما نمشي سوا

معقوله في لحظه الشمس

للكاع ما تنطي ضوه

وتنتهي وما نلكه صبح

معقوله يطلعلي جرح

معقوله ريشة شفتك

ترسملي بالضحكة رمح

لا... مو صدك خلينا من هذا الحجي

بجفوني سوله عالبجي

وصياد كاعد بالجفن

للدمع شايل فالته

وياي احس جنك صرت

مثل الهلال وهالته

كالولك يعوفك ترى

تذكر كبل، كتلي شكلهم

كتلك اي

كلهم لمن من تمشي من يمي جنازته

هو اني عايشلك لان

دمي الاعز ما بالجسد

بس انت تعرف حالته

من ما يحس بلمستك

يخلص وتبقى وشالته

تذكر جنت من تعتنيني بلهفتك

مشتاك حتى تشوفني

وتلكاني روح مشككه

ولمسات اديك تروفني

تتركني هسه قررت

ينطيك كلبك ننتهي

وبس بالاحلام تشوفني

تتركني هيج بلا ذنب

بررلي حتى لو جذب

مليت... كلي كمت امل

شي حمله ليلي بوحدتي

ما ينحمل بعدك ترى

وجذبت كتلك ينحمل

كتلك لمن تمشي ترى

تتركني وحدي جن طفل

تايه وكل اهله مشوا

عايش يتاني الما اجوا

كلشي اليمر يفززه

حتى الشماته تتفززه

من يمشي ويهب الهوا

يلتفت حسباله حجوا

لكن لمن يذكرك

حتى الشماته الما بجوا

من شافوا دموعه بجوا

هيج اني من عني رحت

ما تسكت جروحي ولو

دورتك انا بشدتي

شفتك وطن حنيت الك

لكن لكيتك غربتي

احتاريت منهن يا هو اصح

ما بين ذلي وعزتي

اختاريت اعوفك حتى لا

تكسر قرارك دمعتي

وونيت سكته ما ردت

يشمتون بونتي

صح اضحك بنبرة فرح

بس ركز بصوتي بعد

تسمع نحيب بضحكتي

هم مثلي كلبك ما نسى

وهم من تمشي درب

تذكرني خطواتك بعد

ووتترك فراغ لخطوتي

لا تسكت ال لا بينت

بين اثره بعبرتي

ولا تلتفتلي..... بس ردت انطيك اخر ما بقى

وهوه شبقه

من خذت كلشي وبقت

دمعات ليك بذمتي ...

تسمحلي احبك..؟؟

تسمحلي احبك واخذ عيونك
واشوفن بيك وانت اشوف بعيوني

وتسمحلي انسخك وامسح التصوير
وحطك وسط عيني واقفل جفوني

وتسمحلي اشمك واشهكَ انه وياك
خاطر لايشمك بعدي اي دوني

تسمحلي افك كَلبك وانامن بيه
خاطر من تجي العذال يلكَوني

واذا تسمح ابوسك واشتعل نيران
حتى أنعل والديهم لو يطفوني

تسمحلي اشبكَك شبكَت المشتاق
واموت من اللطم ويطيحن متوني


تسمحلي ابوكَن صورتك بسكوت
واحظنها وانوح الليل خلوني

تسمحلي ابوكَن شفتك تذكار
واصعد مشنقه وخلهم يعدموني

وتسمحلي افجرك وانتحر وياك
ونطشر وفنهم لو يلموني

تسمحلي احطك وسط تابوت
وتمدد وياك وفنهم يطلعوني

وتسمحلي وتسمحلي وتسمحلي
والتسمح طويله وتاهت ظنوني

انـه مسودن عشكـ ..

احبك يعني احبك من كلب ولسان

وشما تحمل احبك من معاني

احبك يعني اسهر ما انام الليل

واحزن لو غبت عني ثواني

بس انته اشوفك من كمت اهواك

وغيرك ما شفت حبك عماني

وبس صوتك اسمعه دون الاصوات

وترفض غير صوتك هاي اذاني

مدري تخبلت مدري العشك هيج

مدري حبك هوه الجنناني

واذا عنتر محبته بعصره مجنون

انه مسودن عشك عصري وزماني

كلـش بأتصـالك واضح ويـاي

كلش بأتصالك واضح الصوت

بس مو واضحة كلش نبرتك

فرق كلش چبير أبين الأثنين

حرورة دمعي وبرودة ضحكتك

صوچك علمتني أفتهمك أبساع

تسكت . وأفتهم كلشي بنظرتك

أمسح جفن عينك من الدموع

گبل لا تخنگ بصدرك عبرتك

فهمتك وآنة گلبي يعجبك بهاي

صوتك يوصلة حتى بسكتك

ولا تعتذر عذرك عندي مقبول

خل همسة ترى وهيچ افتهمتك

بعد لازم وراي أرجع للأحلام

أرد أمسح صور بيهن رسمتك

أجيت أبالي مرة وصدگت جاي

بچيت وشبگة مسودن شبگتك

أشبعد عندك حچي وشرايد تگول

تريد تعوفني ووصلت فكرتك

حبيبي أدلل أدري تريدني أنساك

عفواً . قصدي تدلل حضرتك

مدري شجابني وگلت أتصل بيك

أجة الليل وچنت وحدي وذكرتك

عرفتك من ردت تحچيلي موضوع

حچيته وغلبت حروفك حسرتك

وعرفتك من حچيت بطاري الوداع

عرفتك يمكن أتطول سفرتك

قفلت أحلامي والخط بعده مفتوح

وگلتلي وياي وگلتلك سمعتك

ردت نوصف وكتهة أحساسي وياك

وردت تعرف الحصلته بعشرتك

وبچيت وگتلك أنته تخيل تكون

نص المعركة وتعثر مهرتك

على كل الخلص من عمري ندمان

وعلى كل الوصل منك شكرتك

وأهي حيرة من أودعك أرجع أمنين

وألمن جايك وألمن تركتك

من أرد للشمس هسة بعيني ماشوف

يليلي أنسيتهة بگد ما سهرتك

يالحالفلي بس ما تارك شهود

بس فراشك وحايط غرفتك

أنعم الله عليك گتلي وآنة ممنون

منك ع الوفة الشفته بعشرتك

وبعد ما تفرق أنته تعود لو لا

على كل حال من عدهن خسرتك

قصائد قصيره في الحب والغزل

كتبتك بالقصيده وداخو الشبان قريت اوصافك أنت ودوخت شعري
تعال أرجوك مني اتقرب أهواي تعال بروحي أضمك يالخذت عمري
متوقعك تجيني ومنتظر ملگاگـ انتظرت اهواي أشوفك مانفذ صبري
الك اكتب قصيدة بأسمك أبدي اليوم واختمهه حبيبي وياهوى العذري

ردت اكتب قصيدة وحار بيه البيت ووگف حته القلم مايرضه أوصفنه
گتله اكتب احبك ياأعز أنسان رفض حته الكتابه وساعة اقنعنه
رسم عينك جبيره وحاط بيه سهام وسهام البعينك گلبي صابنه
قبل لاحبك أني گلبي من فولاذ وكلماتك خفيفه وگلبي ذوبنه
جنت ميت يغالي گـبل لاحاجيك والميت عجيبة أشلون اعدلنه

اذا گتلك أعوفك أني غلطان واذا گتلك احبك كارثه تصير
لأنك تختلف مو كان ماكان
ومن بين الاحبهم فرقك جبير
بوسع عينك غرگـ مليون سفان وعلى رمشك هوت كل العصافير
على شفافك نضج سبعين بستان وجمالك ينكتب بس بالأساطير
اكتبت كلمة احبك عله الحيطان بدم كلبي حبيبي مو طباشير

ماشايف مثل حسنك حسن دوم ولاشايف مثل اوصافك اوصاف
وجهك بدر ضاوي وشعرك الليل حرير وطوله واصل حد الارداف
وعيونك عجية شحاويه الوان ماوردت على قاموس الاطياف
صفناتك تصفن عاصف الريح ونظراتك ولافسرهه عراف
مكتنزه الشفايف منبع أغراء حلگـگـ محبس ويادوب ينشاف
الخدود مورده ومنتفضه عالناس آه ياغصن طولك طول صفصاف
ضحكتك نغمه تطرب صوتك ألحان مقام أجديد للموسيقى ينضاف
النرجس من بياضك ماخذ اللون ورد الجوري ماخذ لون الاشفاف
خصرك خصر دله أقياسه أصبعين لكن بالسنين الخصر ينطاف
مشيتك تغري بيك اضعاف الانفوس لا كل البشر مو بس الاضعاف
تعال احضني حيل بحضنك ارجوك وعوضلي العمر وأسنيني الاعجاف
غصب عني أمد أيدي اعله خديك وتتجاسر شفاهي اتبوس الاشفاف
ميظل كل عقل من نگعد وياك أحنه أگبال شفتك كلش أضعاف
واعذرني اذا اتماده كلساع بشر محروم انه وماشايف وشاف..!!


مختصر البحور بدورة العين ومختصر الترافه بلحم الازنود
واشبه بيك اكولن شايفك وين أثاري انت النده الساكن بالاورود
ع شباك بيتك اعكد العين مثل حاجبك انته اشلون معكود
انفقدت بالحرب معروف عالناس وآنه بدروة عيونك صرت مفقود
لأن عينك وسيعه واطلع منين وسره ارموشك بعينك مثل الاجنود
اسألك بس سؤال وكلشي ماريد بس لمن تجاوب رايد أشهود
ممخطوف شعجب واحنه بهالاوضاع وين انت جنت من صار فرهود
جمالك مو طبيعي اهواي ضاف اشياء وخصوصا خدك انت اهواي جملهه
اذن دائما حاول لاتطب للبيت الطبيعه تريد من عندك تكملهه
وردته من الله حجه حته أظل كلساع الاكي عيونك بختله واغازلهه
سامع شخص وك يدلل الكتال نظرتك بيه تكتل وانا ادللهه
شني هذا البياض المزدحم بالأيد يمكن بالحليب ايديك تغسلهه
عليك الله حبيبي بشارع من تفوت ضحكاتك بعد حاول تقللهه
العصفوره التزقزق هم خطيه شبيك بصوت الضحكه جاي انته تخجلهه
كبل لاشوفك اني جنت مدري شلون عايش بالحياة وهيجي حاملهه
بساعتهه اليشوفك لازم المفروض شهادة كون ميلاده يسجلهه

شكتب غزل عنك كلك انت اعجاز اذا طولك قصيدة وصدرك المطلع
ماأكدر اوصفك ابقه يمي اهواي بأوصافك اريدن بعد أتشبع
الأعرفه انت تسولف هسه جاي وياي ولكن صوت بلبل منك آني أسمع
سألت اني صديقي وكال وردة جوري فوكاهه النده أتجمع
جرب مره وادخل للحديقه اليوم على وجهك يجي الفراش يتجمع
لأن عالخد حمار الجوري كلش طوخ ومابين الشفايف للعسل منبع
وماأتولع تريد انه بيك شلون اذا حته كمت بيك انت تتولع
شكد شايل حسن لامايخلص بيوم ويومية حسن للحسن تتبرع
من تمشي وتدوس برجلك انت أتراب يطلعلك زمرد صافي من يلمع
هاي إبرجلك وهيجي التدوسه يصير اذا لحت التراب بشفتك شيطلع..؟؟