انـه مسودن عشكـ ..

احبك يعني احبك من كلب ولسان

وشما تحمل احبك من معاني

احبك يعني اسهر ما انام الليل

واحزن لو غبت عني ثواني

بس انته اشوفك من كمت اهواك

وغيرك ما شفت حبك عماني

وبس صوتك اسمعه دون الاصوات

وترفض غير صوتك هاي اذاني

مدري تخبلت مدري العشك هيج

مدري حبك هوه الجنناني

واذا عنتر محبته بعصره مجنون

انه مسودن عشك عصري وزماني

كلـش بأتصـالك واضح ويـاي

كلش بأتصالك واضح الصوت

بس مو واضحة كلش نبرتك

فرق كلش چبير أبين الأثنين

حرورة دمعي وبرودة ضحكتك

صوچك علمتني أفتهمك أبساع

تسكت . وأفتهم كلشي بنظرتك

أمسح جفن عينك من الدموع

گبل لا تخنگ بصدرك عبرتك

فهمتك وآنة گلبي يعجبك بهاي

صوتك يوصلة حتى بسكتك

ولا تعتذر عذرك عندي مقبول

خل همسة ترى وهيچ افتهمتك

بعد لازم وراي أرجع للأحلام

أرد أمسح صور بيهن رسمتك

أجيت أبالي مرة وصدگت جاي

بچيت وشبگة مسودن شبگتك

أشبعد عندك حچي وشرايد تگول

تريد تعوفني ووصلت فكرتك

حبيبي أدلل أدري تريدني أنساك

عفواً . قصدي تدلل حضرتك

مدري شجابني وگلت أتصل بيك

أجة الليل وچنت وحدي وذكرتك

عرفتك من ردت تحچيلي موضوع

حچيته وغلبت حروفك حسرتك

وعرفتك من حچيت بطاري الوداع

عرفتك يمكن أتطول سفرتك

قفلت أحلامي والخط بعده مفتوح

وگلتلي وياي وگلتلك سمعتك

ردت نوصف وكتهة أحساسي وياك

وردت تعرف الحصلته بعشرتك

وبچيت وگتلك أنته تخيل تكون

نص المعركة وتعثر مهرتك

على كل الخلص من عمري ندمان

وعلى كل الوصل منك شكرتك

وأهي حيرة من أودعك أرجع أمنين

وألمن جايك وألمن تركتك

من أرد للشمس هسة بعيني ماشوف

يليلي أنسيتهة بگد ما سهرتك

يالحالفلي بس ما تارك شهود

بس فراشك وحايط غرفتك

أنعم الله عليك گتلي وآنة ممنون

منك ع الوفة الشفته بعشرتك

وبعد ما تفرق أنته تعود لو لا

على كل حال من عدهن خسرتك

قصائد قصيره في الحب والغزل

كتبتك بالقصيده وداخو الشبان قريت اوصافك أنت ودوخت شعري
تعال أرجوك مني اتقرب أهواي تعال بروحي أضمك يالخذت عمري
متوقعك تجيني ومنتظر ملگاگـ انتظرت اهواي أشوفك مانفذ صبري
الك اكتب قصيدة بأسمك أبدي اليوم واختمهه حبيبي وياهوى العذري

ردت اكتب قصيدة وحار بيه البيت ووگف حته القلم مايرضه أوصفنه
گتله اكتب احبك ياأعز أنسان رفض حته الكتابه وساعة اقنعنه
رسم عينك جبيره وحاط بيه سهام وسهام البعينك گلبي صابنه
قبل لاحبك أني گلبي من فولاذ وكلماتك خفيفه وگلبي ذوبنه
جنت ميت يغالي گـبل لاحاجيك والميت عجيبة أشلون اعدلنه

اذا گتلك أعوفك أني غلطان واذا گتلك احبك كارثه تصير
لأنك تختلف مو كان ماكان
ومن بين الاحبهم فرقك جبير
بوسع عينك غرگـ مليون سفان وعلى رمشك هوت كل العصافير
على شفافك نضج سبعين بستان وجمالك ينكتب بس بالأساطير
اكتبت كلمة احبك عله الحيطان بدم كلبي حبيبي مو طباشير

ماشايف مثل حسنك حسن دوم ولاشايف مثل اوصافك اوصاف
وجهك بدر ضاوي وشعرك الليل حرير وطوله واصل حد الارداف
وعيونك عجية شحاويه الوان ماوردت على قاموس الاطياف
صفناتك تصفن عاصف الريح ونظراتك ولافسرهه عراف
مكتنزه الشفايف منبع أغراء حلگـگـ محبس ويادوب ينشاف
الخدود مورده ومنتفضه عالناس آه ياغصن طولك طول صفصاف
ضحكتك نغمه تطرب صوتك ألحان مقام أجديد للموسيقى ينضاف
النرجس من بياضك ماخذ اللون ورد الجوري ماخذ لون الاشفاف
خصرك خصر دله أقياسه أصبعين لكن بالسنين الخصر ينطاف
مشيتك تغري بيك اضعاف الانفوس لا كل البشر مو بس الاضعاف
تعال احضني حيل بحضنك ارجوك وعوضلي العمر وأسنيني الاعجاف
غصب عني أمد أيدي اعله خديك وتتجاسر شفاهي اتبوس الاشفاف
ميظل كل عقل من نگعد وياك أحنه أگبال شفتك كلش أضعاف
واعذرني اذا اتماده كلساع بشر محروم انه وماشايف وشاف..!!


مختصر البحور بدورة العين ومختصر الترافه بلحم الازنود
واشبه بيك اكولن شايفك وين أثاري انت النده الساكن بالاورود
ع شباك بيتك اعكد العين مثل حاجبك انته اشلون معكود
انفقدت بالحرب معروف عالناس وآنه بدروة عيونك صرت مفقود
لأن عينك وسيعه واطلع منين وسره ارموشك بعينك مثل الاجنود
اسألك بس سؤال وكلشي ماريد بس لمن تجاوب رايد أشهود
ممخطوف شعجب واحنه بهالاوضاع وين انت جنت من صار فرهود
جمالك مو طبيعي اهواي ضاف اشياء وخصوصا خدك انت اهواي جملهه
اذن دائما حاول لاتطب للبيت الطبيعه تريد من عندك تكملهه
وردته من الله حجه حته أظل كلساع الاكي عيونك بختله واغازلهه
سامع شخص وك يدلل الكتال نظرتك بيه تكتل وانا ادللهه
شني هذا البياض المزدحم بالأيد يمكن بالحليب ايديك تغسلهه
عليك الله حبيبي بشارع من تفوت ضحكاتك بعد حاول تقللهه
العصفوره التزقزق هم خطيه شبيك بصوت الضحكه جاي انته تخجلهه
كبل لاشوفك اني جنت مدري شلون عايش بالحياة وهيجي حاملهه
بساعتهه اليشوفك لازم المفروض شهادة كون ميلاده يسجلهه

شكتب غزل عنك كلك انت اعجاز اذا طولك قصيدة وصدرك المطلع
ماأكدر اوصفك ابقه يمي اهواي بأوصافك اريدن بعد أتشبع
الأعرفه انت تسولف هسه جاي وياي ولكن صوت بلبل منك آني أسمع
سألت اني صديقي وكال وردة جوري فوكاهه النده أتجمع
جرب مره وادخل للحديقه اليوم على وجهك يجي الفراش يتجمع
لأن عالخد حمار الجوري كلش طوخ ومابين الشفايف للعسل منبع
وماأتولع تريد انه بيك شلون اذا حته كمت بيك انت تتولع
شكد شايل حسن لامايخلص بيوم ويومية حسن للحسن تتبرع
من تمشي وتدوس برجلك انت أتراب يطلعلك زمرد صافي من يلمع
هاي إبرجلك وهيجي التدوسه يصير اذا لحت التراب بشفتك شيطلع..؟؟

مختارات شعرية غزلية

ماأكلك عسل ماتقبل ادريك وتعرف ليش ماأكلك يمعسول؟

جبت من المناحل عسل مقياس طلعت الخالص انت وهو محلول

اذا ماتقبل انته انشم عطر بيك أذن منبوس خدك هذا معقول..!!

بعين امه غزال المو حلو يصير وغزال الجنه بيك يصير مجهول

اذن لو سألو أمك عنك شلون الله يساعد أمك مدري شتكول..؟

مايكمل حسن محتار عقلي وياك عد أمك وأبوك من الحسن مصنع؟؟

تنست بالشمس امك وطلكت بيك لو جابت وشمس من الارض تسطع..؟؟

ياوصف الاوصفك بيه حتى ارتاح شكلك جنك انت واسكت واقنع..!!

يوسف اخذ تسعه عالجمال البيه بس انت اعله يوسف تاخذ مربع

ع شفافك تحط كل الفراشات وعلى صوتك غفت اهدأ موسيقى

وعلى خدودك اشوفن كل الاورود وعلى الوجنه انضجت أجمل حديقه

حقيقه انت كمر يمشي أعله هالكاع وعلم الفلك أكد هالحقيقه

من شافك الكمر بعض الضوه البيك تركلك هالسمه وماظل دقيقه

العميد اليفتهم والصح عميد يعزلك انت لوحدك في قاعه
تشده الطلاب في حسنك تحير شايل اصناف الحسن وانواعه
مدوخ استاذك النص ساعه شتصير بس صفنته عليك فوك الساعه

أمس من گد جمالك يوم مريت شفنه الشارع أمجلب بالجدام
بجمال أجدامك أنت امدوخ الناس يستر الله من الفوك الحزام
نجوم صورتك من ردنه فديوم مارهمت الجامه وهالسبب هام
لأن جبال صدرك عاليه اهواي وهم شايف أجبال انحطن بجام؟؟
انه لشباج صدرك جاي وادخيل وبشفافي ذنب وعليك محتام
عود انت جمالك ساتره الثوب لعد جوا الهدوم لناسك شضام..؟؟
دوله وعلم طولك بين هالناس وتقديرا الك ولشخصك أكرام
اذا اطب غير دوله تخلي قانون احترام لشخصك ينزلون الاعلام
بجمالك واحد وأول من يعدوك وفخر كلهه وراك أتصير الارقام

ابوذيات

حبيبي ومن بعد قربي ( شمس ماي )
الخصر ماي واذا الزم ( شمس ماي )
السنه بلحظه
الكلب شظه
صفر حظه
صبح كافر
بمي شفتك
اجه اتوضه
الك كاتب
اذا تسمع
فقط ومضه
يل مالك جمال ابمشيك عالكاع
ملك الحسن جنك حقنه لو نخدر
تكبرلك شهر تصغر بعشر سنين
ربك خالقك تصغر شما تكبر
واسئلك هم شفت كبلي ( شمس ماي )
الشمس ماي بغيابك تصفه ليه


غير اللي تضحيله يضح كون
وكمرة بليلك الاسود يضح كون
مشيت وعفت شماتي يضحكون
تبجيهم لمن ترجع الية ..

مثل مای النهر من سهر بالحب
انا گاعی عسل والملح بالحب
یگلبی وهدنتنی اردود بالحب
اشمالک ما درت بالک علیه

غزل عينك رهن روحي وجرهه
وشعل نيران البكلبي وجرهه
اريد اتمسك بشفتك واجرهه
حتى انقل ذنوب البيك الية

احس الكَلب واكَف من تكلمة
وراح انطيك كَلبي وانت كلمة
بعد مااكَدر اسكت هية كلمة
احبك حتى لو تزعل عليه.

يل طبع العسل دمك...طبعه إنته
إذا بالدنيه اهوي واحد...طبعن انته
تقرير لگلبي إكشف و...طبعه إنته.
يطلع مكتوب؟؟احبك؟؟ للمنيه.

حجي الوجهين صدك مو طبعنة
ولجل عين الحبايب موطة بعنة
حجي استنساخ بالحب ماطبعنة
نزف شريان ننزف كل مسية

وحق الي محه العزه محه اللات
شفافك عسل من ربك محلات
الك على الشارع بكلبي محلات
محل حب ومحل شاعريه

محبتكم عشو ليلي عشانه
الاحبه الروح انذرهة عشانه
اشتهينه اليوم من خدك عشانه
نضوكه اشويه منه وهاي هيه

نــاصي البخــت ويـايـه علي وياك
واجيــت اليـوم اباركلك علي وياك
اغلطت من گتلك امودع علي وياك
علــي مايمشي ويــه الخـــان بيه

وحك نجمات عيني الطشرته بليل..

وحــــك نجمات عيني الطـــــشرتها بليل
وحك كل حرف عاش بصــــــفنتي العذبة

وحــــك ذيج الترافة الخلـــــــــصتها عليك
وحــــك كل بيت دافن بيــــــــه الك ضربة

وحــــك خيط امنياتي البــــــــيك معكودات
وحــــــك جنة أحلامي البـــــــقت ملتهبة

بعـــــد ما أحن إلك مــــــــثل الحنان الفات
وطـــــــيفك من يمــــــــر بعيوني ما أكلبه

أنــــــه بعازة وطن يجــــــمعني من منفاي
مارايد وطن بيه أشــــــــــعــــــــر بغــــــربة


صــــح بيك أذنبت والشـــــــوك غالب جان
لجن للذنب ربي مشـــــــــرع التـــــــــوبة

بـس والخله صوتك بذن غـــــــــيري يصير
ابــــــن آدم حيــــل يكـــــــــبر لو زغر ذنبة

يــبو كلب الأبد ماضــــاك طــــــعم الشوك
عــــــرفت اللــــــي يحـــــبك تكـــــره تحبة

ويـــــل إبالي إزرعت حسبات ملــــغومات
كــــــــــــامت بيك حسبة تفــــجر بحسبة

كتـــــــــلك من جنت تحلم بفيـــي تعيش
الحـــــــــــب مايعيش بكلـــــب ســد كلبة

ومــن حسيت كلبك بيه طـــــمع ويـــــاي
ضــــــربتلك مثل واحد محــــد يضـــــــــربة

عـــــــــاين عالشمس لمن تــــــريد تغيب
بعــــــــــيون البلابل تــــــزرع الــــــــــرهبة

ماتلكـــة ثمر بــــــس بيهاركّـــــــــــز زين
إشلــــــــون وي العصر تزدحم عالـــغربة؟؟

وكتلك عالتواضع مــــــــــــــــــيزة العشاك
من شفت الـــــــــــــــــــــغرور بكلبك تربة

وانطيتك مــــــــــــــــــثل بس تيهت معناه
لان جانت الــــــــــــــوردة بنظرتك لــــعبة

الفراش ابيض لبس واعليها ظل يــــطوف
لان بعيونه جـــــــــــــــانت تنحسب كعبة

ورغم كل الجــــــــمال البيها تحني الهام
وتركع مثـــــــــــــــــل عابد لبه أمـــــر ربه

مـــــيلاد الجـــرح بيدك مقيد جــــــــــــان
وما أشـــــــــــوفن إبإيدك تكـــــدر تطـيبة

لابـــــــس ثوب واحد جبت عــمري وياك
وإنت ويـــــــــاه جنت تمشي بجلد حربة

أنطيتك كلب تحــــــلم الـــــــــــــوادم بيه
كتـــــــــلك صونــــه إلي ماكتــــلك تخربة

أووضحت الخلـــــــــود وسولفـــتلك بـــيه
وكتـــــــــلك لاتصدك فكــــــــرة العــــشبة

المايوفي بعشـــــــرته ينسي من يموت
اليـــــــحب كلبه بصــــــدق يتــخلد بحبه

تعاليلي

تعاليلي ابتسامه بگد كبر فرگاج
جرحي انا يطيب بصوت ضحكاتج

عله دجله صفنتي ووگف مجرى الماي
وحياتي اتوقفت گدام صفناتج

منو گال انتي صوتج ناي من تحجين
 صوت الناي يطلع وي حسراتج

وهلگد مارقيقه وشايله انتي احساس
فراشات تطلع وي نظراتج

مامجروح منج بس جرح فرگاج
وأشكبره الجرح؟ يمكن كبر ذاتج

واطعنيني اعله كيفج الف طعنة موت 

بس ماريد عيني تشوف دمعاتج

واطعيني وي گـلبي الف طعنة موت 

نخلص الليل كله نبوس طعناتج

خل أصحه اعله شوفج ترسي عيني احلام 

ربيني طفل وابخيمة احساسج

شايل شوگـ ألج ماادري أوصفه إبيش

 اكض روحي واگولن هاي لمساتج

غصن روحي يفز لمن يمر طاريج فوگه شجم جرح وبذكرج يطيرن

بس يندار وجهج الف جرح يصير ومدري شكد اذا ماشوفج يصيرن

من تعطش ارض ترتوي برشگة ماي

 وعطشت روحي الج ياماي يرويها

وعطشت عيني ألج بس ترتوي بملگاج

 ولو بس صوره منج عاد ألهيها

وره صوتج بعد ماسمعت اذني الصوت

 واحس الدنيا خرسه وصوت مابيها

جنت ماأنسى كل لحظه التمر وتروح 

هسه الدنيا بعدج كلها ناسيها

مامحني گبل رغم العليه اثگال

 بس بعدج غصب عالروح حانيها

اذا تيهت دمعتي البجي ادروبه منين

 انه اخذ دمعتي وبيدي ادليها

توگع ورده تحزن شجرة البستان 

واحسج مني ضعتي شلون اعديها

فهميني النهايه فرح لو تابوت 

ياهو الجان سهله المهم تاليها