مختارات شعرية غزلية

ماأكلك عسل ماتقبل ادريك وتعرف ليش ماأكلك يمعسول؟

جبت من المناحل عسل مقياس طلعت الخالص انت وهو محلول

اذا ماتقبل انته انشم عطر بيك أذن منبوس خدك هذا معقول..!!

بعين امه غزال المو حلو يصير وغزال الجنه بيك يصير مجهول

اذن لو سألو أمك عنك شلون الله يساعد أمك مدري شتكول..؟

مايكمل حسن محتار عقلي وياك عد أمك وأبوك من الحسن مصنع؟؟

تنست بالشمس امك وطلكت بيك لو جابت وشمس من الارض تسطع..؟؟

ياوصف الاوصفك بيه حتى ارتاح شكلك جنك انت واسكت واقنع..!!

يوسف اخذ تسعه عالجمال البيه بس انت اعله يوسف تاخذ مربع

ع شفافك تحط كل الفراشات وعلى صوتك غفت اهدأ موسيقى

وعلى خدودك اشوفن كل الاورود وعلى الوجنه انضجت أجمل حديقه

حقيقه انت كمر يمشي أعله هالكاع وعلم الفلك أكد هالحقيقه

من شافك الكمر بعض الضوه البيك تركلك هالسمه وماظل دقيقه

العميد اليفتهم والصح عميد يعزلك انت لوحدك في قاعه
تشده الطلاب في حسنك تحير شايل اصناف الحسن وانواعه
مدوخ استاذك النص ساعه شتصير بس صفنته عليك فوك الساعه

أمس من گد جمالك يوم مريت شفنه الشارع أمجلب بالجدام
بجمال أجدامك أنت امدوخ الناس يستر الله من الفوك الحزام
نجوم صورتك من ردنه فديوم مارهمت الجامه وهالسبب هام
لأن جبال صدرك عاليه اهواي وهم شايف أجبال انحطن بجام؟؟
انه لشباج صدرك جاي وادخيل وبشفافي ذنب وعليك محتام
عود انت جمالك ساتره الثوب لعد جوا الهدوم لناسك شضام..؟؟
دوله وعلم طولك بين هالناس وتقديرا الك ولشخصك أكرام
اذا اطب غير دوله تخلي قانون احترام لشخصك ينزلون الاعلام
بجمالك واحد وأول من يعدوك وفخر كلهه وراك أتصير الارقام

ابوذيات

حبيبي ومن بعد قربي ( شمس ماي )
الخصر ماي واذا الزم ( شمس ماي )
السنه بلحظه
الكلب شظه
صفر حظه
صبح كافر
بمي شفتك
اجه اتوضه
الك كاتب
اذا تسمع
فقط ومضه
يل مالك جمال ابمشيك عالكاع
ملك الحسن جنك حقنه لو نخدر
تكبرلك شهر تصغر بعشر سنين
ربك خالقك تصغر شما تكبر
واسئلك هم شفت كبلي ( شمس ماي )
الشمس ماي بغيابك تصفه ليه


غير اللي تضحيله يضح كون
وكمرة بليلك الاسود يضح كون
مشيت وعفت شماتي يضحكون
تبجيهم لمن ترجع الية ..

مثل مای النهر من سهر بالحب
انا گاعی عسل والملح بالحب
یگلبی وهدنتنی اردود بالحب
اشمالک ما درت بالک علیه

غزل عينك رهن روحي وجرهه
وشعل نيران البكلبي وجرهه
اريد اتمسك بشفتك واجرهه
حتى انقل ذنوب البيك الية

احس الكَلب واكَف من تكلمة
وراح انطيك كَلبي وانت كلمة
بعد مااكَدر اسكت هية كلمة
احبك حتى لو تزعل عليه.

يل طبع العسل دمك...طبعه إنته
إذا بالدنيه اهوي واحد...طبعن انته
تقرير لگلبي إكشف و...طبعه إنته.
يطلع مكتوب؟؟احبك؟؟ للمنيه.

حجي الوجهين صدك مو طبعنة
ولجل عين الحبايب موطة بعنة
حجي استنساخ بالحب ماطبعنة
نزف شريان ننزف كل مسية

وحق الي محه العزه محه اللات
شفافك عسل من ربك محلات
الك على الشارع بكلبي محلات
محل حب ومحل شاعريه

محبتكم عشو ليلي عشانه
الاحبه الروح انذرهة عشانه
اشتهينه اليوم من خدك عشانه
نضوكه اشويه منه وهاي هيه

نــاصي البخــت ويـايـه علي وياك
واجيــت اليـوم اباركلك علي وياك
اغلطت من گتلك امودع علي وياك
علــي مايمشي ويــه الخـــان بيه

وحك نجمات عيني الطشرته بليل..

وحــــك نجمات عيني الطـــــشرتها بليل
وحك كل حرف عاش بصــــــفنتي العذبة

وحــــك ذيج الترافة الخلـــــــــصتها عليك
وحــــك كل بيت دافن بيــــــــه الك ضربة

وحــــك خيط امنياتي البــــــــيك معكودات
وحــــــك جنة أحلامي البـــــــقت ملتهبة

بعـــــد ما أحن إلك مــــــــثل الحنان الفات
وطـــــــيفك من يمــــــــر بعيوني ما أكلبه

أنــــــه بعازة وطن يجــــــمعني من منفاي
مارايد وطن بيه أشــــــــــعــــــــر بغــــــربة


صــــح بيك أذنبت والشـــــــوك غالب جان
لجن للذنب ربي مشـــــــــرع التـــــــــوبة

بـس والخله صوتك بذن غـــــــــيري يصير
ابــــــن آدم حيــــل يكـــــــــبر لو زغر ذنبة

يــبو كلب الأبد ماضــــاك طــــــعم الشوك
عــــــرفت اللــــــي يحـــــبك تكـــــره تحبة

ويـــــل إبالي إزرعت حسبات ملــــغومات
كــــــــــــامت بيك حسبة تفــــجر بحسبة

كتـــــــــلك من جنت تحلم بفيـــي تعيش
الحـــــــــــب مايعيش بكلـــــب ســد كلبة

ومــن حسيت كلبك بيه طـــــمع ويـــــاي
ضــــــربتلك مثل واحد محــــد يضـــــــــربة

عـــــــــاين عالشمس لمن تــــــريد تغيب
بعــــــــــيون البلابل تــــــزرع الــــــــــرهبة

ماتلكـــة ثمر بــــــس بيهاركّـــــــــــز زين
إشلــــــــون وي العصر تزدحم عالـــغربة؟؟

وكتلك عالتواضع مــــــــــــــــــيزة العشاك
من شفت الـــــــــــــــــــــغرور بكلبك تربة

وانطيتك مــــــــــــــــــثل بس تيهت معناه
لان جانت الــــــــــــــوردة بنظرتك لــــعبة

الفراش ابيض لبس واعليها ظل يــــطوف
لان بعيونه جـــــــــــــــانت تنحسب كعبة

ورغم كل الجــــــــمال البيها تحني الهام
وتركع مثـــــــــــــــــل عابد لبه أمـــــر ربه

مـــــيلاد الجـــرح بيدك مقيد جــــــــــــان
وما أشـــــــــــوفن إبإيدك تكـــــدر تطـيبة

لابـــــــس ثوب واحد جبت عــمري وياك
وإنت ويـــــــــاه جنت تمشي بجلد حربة

أنطيتك كلب تحــــــلم الـــــــــــــوادم بيه
كتـــــــــلك صونــــه إلي ماكتــــلك تخربة

أووضحت الخلـــــــــود وسولفـــتلك بـــيه
وكتـــــــــلك لاتصدك فكــــــــرة العــــشبة

المايوفي بعشـــــــرته ينسي من يموت
اليـــــــحب كلبه بصــــــدق يتــخلد بحبه

تعاليلي

تعاليلي ابتسامه بگد كبر فرگاج
جرحي انا يطيب بصوت ضحكاتج

عله دجله صفنتي ووگف مجرى الماي
وحياتي اتوقفت گدام صفناتج

منو گال انتي صوتج ناي من تحجين
 صوت الناي يطلع وي حسراتج

وهلگد مارقيقه وشايله انتي احساس
فراشات تطلع وي نظراتج

مامجروح منج بس جرح فرگاج
وأشكبره الجرح؟ يمكن كبر ذاتج

واطعنيني اعله كيفج الف طعنة موت 

بس ماريد عيني تشوف دمعاتج

واطعيني وي گـلبي الف طعنة موت 

نخلص الليل كله نبوس طعناتج

خل أصحه اعله شوفج ترسي عيني احلام 

ربيني طفل وابخيمة احساسج

شايل شوگـ ألج ماادري أوصفه إبيش

 اكض روحي واگولن هاي لمساتج

غصن روحي يفز لمن يمر طاريج فوگه شجم جرح وبذكرج يطيرن

بس يندار وجهج الف جرح يصير ومدري شكد اذا ماشوفج يصيرن

من تعطش ارض ترتوي برشگة ماي

 وعطشت روحي الج ياماي يرويها

وعطشت عيني ألج بس ترتوي بملگاج

 ولو بس صوره منج عاد ألهيها

وره صوتج بعد ماسمعت اذني الصوت

 واحس الدنيا خرسه وصوت مابيها

جنت ماأنسى كل لحظه التمر وتروح 

هسه الدنيا بعدج كلها ناسيها

مامحني گبل رغم العليه اثگال

 بس بعدج غصب عالروح حانيها

اذا تيهت دمعتي البجي ادروبه منين

 انه اخذ دمعتي وبيدي ادليها

توگع ورده تحزن شجرة البستان 

واحسج مني ضعتي شلون اعديها

فهميني النهايه فرح لو تابوت 

ياهو الجان سهله المهم تاليها

دفــــو حـضــنـك

گـصر شوگـك عليه وطال صبري أعليك وعله امثالك بعد ماترهم أمثالي

جنت مالي گـبل من جنت تنزف شوگـ بس هسه انتهيت وصرت مو،،،مالي

لاتنغر بطولك ولو طولك بان وعله صدرك عنب عشرينك أيلالي

السعف هم عالي لكن مايشيل احساس وعله احساب الجذر صار السعف عالي

شتلتك بيدي لهفه وخضريت أفراك ويم بيبان عينك دمعة أسلالي

ألمن جايني وياجرح جبته وياك حافظهن عليمن جاي تقرالي

جرف شالك ضميري وماشربتك ماي وآنه أنزف عطش والصبر يبرالي

لتغرني بدمعتك ذاك گلبي أنساه مايشتاگلك صار الگلب خالي

أشد عيني أبرمح لو مره حنت ليك واعميهه اذا طيفك تعنالي

ندم خضرن أجروحي وماگلتلك شوف ولاگـدام عينك رخصت حالي

شتلهن وادري ذنبي وأنه مامعذور عله أخيال الشمس جنت اشتل آمالي

بعد مايهز شوگـك شعره من الروح ولايم بحر عينك تلتف أحبالي

ولا أحن لمناير صدرك المجنون ولا عنك بعد ينسمع موالي

عرفت أبرخص شعرك والسواد البيه وعرفت أبذهب صدرك جان مو غالي

وعرفت أبدفو حضنك حرگـ غيري أهواي وعرفت بليلمن ظل شمعك يلالي

وعرفت ألمن بعتني وياجفن غراك وعرفت بيا نده بدلت شلالي

كبر جرحك أبروحي بيا عذر ينراف ترس جسمي ونزل ظل ياكل أخيالي

الشمس غرتني بيك وجنت أشوفك ماي ويهزني الهوه والدرب يحلالي

ورخصك باع عمري وماگـدرت انساه وشلته من الگـلب بس زنجر أبالي

ولك جتالي انته وهسه جاي أتريد أغسل دم رگـبتي أبسيف جتالي

جنسيتي محبتكـ

مجنون أبمحبتك يا اعز إنسان
يا أجمل قصيدة و أحلى معزوفة

يا مالك خيالي و فكري يا معسول
اكتب بس إلك كل شعري و حروفه

قافيتي شفافك و الوزن رمشين
و عيونك بحور الشعر موصوفة

صوتك عدّة بالغبشة نغم فيروز
و ام كلثوم من قاموسي محذوفة

ألف ليلة عسل عشناها آني وياك
و الليلة إلّي ضلت اضن معروفة

نگضيهه حضن و نطابگ الشفتين
و نغني و نسولف أحلى سالوفة

يا كلشي بحياتي و يا فرح دنياي
يا من شلت من گليبي كل خوفه

ما أضنك تبيع و لا أبيعك يوم
اكو واحد يبيع گليبه و يعوفه

و خطية الگمر يبچي و يون تالي الليل
حدر الغيم يختل صابته الخوفة

و گمر ليل المحبّة بشوفتك مقهور
إذا حتى الگمر بالليل بچيته

و گلوب الشباب تفرفح امن تفوت
و الشايب بعطرك اضن شليته

و نسوان ألتشوفك منك يغارون
و ألبعده مراهق نظرة أمنيته

و الطفل إلّي يرضع بعده بالكاروك
ضل يمشي وراك و يحچي خليته

و إذا شرطي طلب مني هويتي بيوم
أبرز صورتك تشتعل بيبيته

يفتحلي الطريق بصورتك مبهور
إجلالاً يدنگ و يذب بيريته

جنسيتي محبتك تدري كلش زين
شنو قيمة ليضيّع يوم جنسيته

حبك غيراني و صرت أموت عليك
شتلت گليبك بنص گلبي و سگيته

و الدم إلّي يسري بجسمي ما أحس بيه
دمك يسري بالشريان حسيته

انت العلمتني العشگ و الإحساس
فضلك عالگلب لن يدگ خليته

علّمته البراءة و طفل صار وياك
يمشي و ما يريد ايرد على بيته

فرحان و اجالك تدري يوم العيد
رايد بوسه منك هايه عيديته

يا أجمل بشر خالقك رب الكون
يا أطيب گلب بالصدفة لاگيته

يا أوفى البشر يا حلمي يا دنياي
يا أول شخص من گلبي حبيته

دوّرت شكثر ما شفت مثل شفاك
علاج و كل مرض من بستك نسيته

شلت كل المواجع من گلب تعبان
بيدك جرح الي ابدلالي داويته

يا اسمي الثلاثي و گمر تالي الليل
رسمك بالگلب و بدمي خطّيته

يا قوس و قزح يا مثل للعشاگ
يعشگ گلبي حد الشيب وصيته

فرض سادس أشوفك صار تالي الليل
نسيت الخمسة و السادس أنا أديته

صدّگني احبك حد گطع لأنفاس
لأنك انت حلمي إلّي تمنيته

تمنيتك گبل ما أشوفك امن سنين
حبك بالگلب من زغري ربيته

ما أضيعك من ايدي و لا أفرّط بيك
إلا بحالة گلبي يعوف جنسيته

إذا يلفي عليّة بليلة ملك الموت
اعذر گلبي لمن توصل منيته

فدوه لله

فدوه لله الرتبه يم طولج تلوك
شبيهه لو توكف خفر يم بابي
والله لو بس عدنه منج عشره جان
مايضل بالبلد نص ارهابي





 

تذكر كتلي انجح والتريدة يصير
نجحت اني واريدن شوفتك هسه..!!

 

ياربي موعندك ملك ياخذ الروح. 
شلون ترضى انسان ياخذ روحي..!!

 


اسولف بس دمع للجاي خطار
وخطاري الحزن بيمن اسولف..؟؟



انته من تمشي الورد يصفن عليك 
وحتى من شافك طلع من طوره
واني بعيوني شفت منظر عجيب 
ورده حــمره ويــاك تاخــذ صـوره




جنت اعتب على اليشرب نراكيل ....
هسه بغيبتك اشرب بلنكوو؟؟؟