الثلاثاء، 19 فبراير 2013

مــدري شحجــي

مدري شحجي

والله خبلني كلامك

مدري اضحك

مدري ابجي

مدري اكض دموعي واسكت

وابقى بس بعيوني احجي

جاي هسه تكول انسه

من بعد ماجنت كلشي

من بعد حبنا وسهرنا

والليالي البيها عشنا

شكد تعبنا شكد حملنا

شكثر ضيم بحبنا شفنا

ما اسد رمشي على عيني

اله اشوفك انته بيها

يله اسد اعليها رمشي

راح اكض لساني واسكت

والعن الشيطان وامشي

....

ثنينكم نفس المكان

بحركه من عيني وكعتوا

انت ودموعي سويه

ثنينكم من عدها طحتوا

وشي قديم

الذكرى صارت

كبل جنتو اعزاز عندي

هسه من الماضي صرتوا


يبــو سـوالــف شتــه..2013

يبو سوالف شته ينكَـط برد ملكَـاك
أذا مو بيك روحي أبيش أدفيهه

المبادئ والقيم ماتشمل اليشتاكَـ
الهجر رب المذلة القيم شعليهه

مشيت وقصرت ماخذت عيني وياك
الأخذ عيني بغيابك بس بواجيهه

أنا صفّيت روحي أمن المضه بلياك
وأنته وياي نيتك مامصفيهه

ضيعت العرف كَـطره أبّحر نسيان
وأنا لمسة جفوفك محتفظ بيهه

شجرة الذكريات أسترهه بلكي تعيش
ولو طبعك خريف وماتسويهه

يل مكشف عشرتي كبال ياهو الجان
وآنه حروف اسمك مامراويهه

هواي الحذروني وقنعتهم بيك
ومو كل الأصابع سوه نسميهه

غشيم وزامطت تالي بندم رديت
فاتتني الأصابع لو مساويهه

طويل الليل أكَـمطه بيا صبح وينام
ما أتيه دروبه وكلهه ماشيهه

مغشوش الهوه الما أشم عطرك بيه
النسمه خلاف وجهك كَـوه أعديهه

فراغك بيش اترسه الذكرى ماتكفيه
عشت بدنيه بعدك كلشي مابيهه

محضرلك عتب بس كون ما أنساه
لان من يوم شفتك روحي ناسيهه ،.

يحركني حطب..2013

يحركني حطب ويطشني بيده رماد
ويكلي بهمس ارجوك لاتـــــــــزعل

 
لاتزعل يكلي ويعمي عيني دموع
واسكت خاف اجرحه وكوه اتحمل

 
اكله افهمني ما اقصد اذيتك لا
وك شلون اجرحك ..؟ اني ما اقبل

 
يدفعني ويهد كلماته كلهه جروح
فوك جروح كلبي البيهن معلعل

 
اكفر لو كلتله (شبيك اخاف اعليك)
يكلي انت بحياتي هواي تتدخل

 
ويجويني بحزن بيديه هاي وهاي
وما يهتم ابد لو كلت راح ارحل

 
ادري شلون كلي وياك مـا ازعل ؟؟
تدريني احبك ليش تتبدل ؟؟

 
تدريني اشتعل من تحجي ويه الغير
احسك بييه انته بكلبي تتختل

 
يامشتل زعل .. تتمنه اموت ادريك
حـــــــــــــاظر مبتعد .. كل حب الك ماضل

 
ضعت من عندي اني بكل ضلام الليل
وبالضلمه اعتقد تدريني مــــــــا اندل..؟